Ulluunerani paaqqinnittarfiit, ulluunerani angerlarsimaffimmi paaqqinninneq il.il. pillugit inatsisartut peqqussutissaattut siunnersuummut nassuiaatit

 

Nassuiaatit nalinginnaasut

Isumaginninnermik Iluarsaaqqinnermut Ataatsimiisitaliarsuup 15. april 1997-imi isumaliutissiissummini inassuteqaatai tunngavigalugit siunnersuutigineqarpoq ulluunerani paaqqinnittarfiit ulluuneranilu angerlarsimaffimmi paaqqinnittarneq pillugit aalajangersakkat avissaartinneqassasut, inatsisartut peqqussutaattut immikkoortinneqarlutik.

Atualersimanngitsunut ulluunerani neqoroorutit pillugit immikkoortumik aalajangersagaliornikkut meeqqat paarineqarnissaat isumaginninnikkut suliniutaasariaqanngitsoq erseqqinnerulissaaq. Ulluunerani paaqqinnittarfinni il.il. isumaginninnikkut perorsaanerup ingerlanneqartup allanngortinneqarnissaa siunniunneqanngilaq.

Kultureqarnerup, atuarfeqarnerup aammalu ulluunerani paaqqinnittarfeqarnerup il.il. ataatsimiititaliamut ataatsimut ataatsimoortinneqartarneri kommunini amerlanerujartuinnartuni takussaaleriartorpoq. Ulluunerani paaqqinnittarfiit, ulluunerani angerlarsimaffimmi paaqqinniffiit il.il. inatsisartut peqqussutaannut immikkoortinneqarlutik aalajangersaaffigineqarnerat kommunit amerlasuut eqaannerusumik suliniuteqarnissamik ujartuinerannik akuersaarneruvoq, tassungalu ilutigitillugu oqartussaaffiup allamut nuunneqarnissaa periarfissinneqarluni.

Meeqqanik inuusuttunillu ikiorsiisarneq pillugu Inatsisartut peqqussutaanni nr. 9-mi, 30. oktober 1992-imeersumi §§ 29-30 aamma § 32 maanna atuuttut eqqarsaatigalugit allannguuteqartitsivinnissaq pilersaarutaanngilaq. Aalajangersakkat atuaruminarsarniarlugit oqaasilerinermi naqqiissuteqartoqarsimavoq katiterisoqarsimallunilu. Ukiut killigititaasut pillugit § 29-mi aalajangersagaq allanngortinneqarpoq peqqussummi erseqqissumik takuneqarsinnaalersillugu neqeroorut taamaallaat meeqqanut 15-it ataallugit ukiulinnut atuuttoq, tamannalu suleriaatsimut atorneqartumut naapertuuppoq.

Meeqqanik inuusuttunillu ikiorsiisarneq pillugu Inatsisartut peqqussutaanni nr. 9-mi, 30. oktober 1992-imeersumi § 31 peerneqarpoq, matumani innersuussutaalluni pineqartup isumaginninnermi pitsanngorsaaneq pillugu kaajallaasitaq 213-imi iluarsiivigineqareermat, tak. Inatsisartut peqqussutaat nr. 9, 30. oktober 1998-imeersoq, isumaginnittoqarfiup aqunneqarnera aaqqissuussaaneralu pillugit, taamatullu pisariaqarsorineqarsimanngilaq tamatuma siunnersuummi uteqqinnissaa.

Inatsisartut peqqussutaata akuersissutigineqarneranut atatillugu naatsorsuutigineqarpoq piginnaassuseqartitaaneq pillugu aalajangersakkat eqqarsaatigalugit nalunaarusiortoqarnissaa, aalajangersakkanik makkuninnga imaqartussamik:


Tusarniaaffigineqartut makkuupput:

KANUKOKA, kommuninut tusarniaanissaanik qinnuigalugu
Peqqinnissaqarfiup iluani suleqatigiit
Sulinermik Inuussutissarsiutillit Kattuffiat
P.I.P.
I.M.A.K.
Aqutsinermut Pisortaqarfik
Peqqinnissamut Pisortaqarfik
Kultureqarnermut, Ilinniartitaanermut, Ilisimatusarnermut Ilageeqarnermullu Pisortaqarfik
Aningaasaqarnermut Pisortaqarfik
Nunap immikkoortuini allaffiit, Ilulissani Qaqortumilu,
Paaqqinnittarfeqarnermut allaffik

Tusarniaanermi akissuteqaatit pissutissaqalersitsipput ukiunut killigititaasumik allanngortitsinissamut, oqaasiliornerullu annikitsumik allanngortinneqarneranut.


Aqutsinikkut aningaasaqarnikkullu kingunissai

Naatsorsuutigineqanngilaq siunnersuutip aqutsinikkut aningaasaqarnikkullu kinguneqarnissaa.

 

Aalajangersakkanut ataasiakkaanut nassuiaatit

§ 1-imut

Aalajangersagaq peqqussutip atuuttup § 29-ata assigipajaarpaa.

Ukiunut killigititaasoq allanngortinneqarpoq, peqqussummi erseqqinnerulersinneqarluni neqeroorutip meeqqanut 15-it inorlugit ukiulinnut tunngasuunera. Ulluunerani paaqqinnittarfiit tassaasinnaapput meeraaqqeriviit, meeqqeriviit sunngiffimmilu paaqqinnittarfiit.

Inissat pisariaqartinneqartut amerlassusissaannik aalajangersakkap kommuni pisussaaffilerpaa ulluunerani inissanik pisariaqartinneqartunik neqerooruteqarnissaanik. Kommunip nammi-neerluni missiliortarpaa inissat qanoq amerlatigisut pilersinneqassanersut. Missiliuussinermi pingaartitat arlaqartut ilanngunneqarsinnaapput, tassunga ilaallutik neqeroorutaasinnaasut, ulluunerani paaqqinnittarfimmi inissamik maannakkorpiaq pisariaqartitsineq pisariaqartitsilernissamullu missingersuut kiisalu aningaasaqarnermut tunngasut. Inissanik pilersitsinermi tamanna pillugu oqartussaasunit malittarisassatut aalajangersagaasinnaasut malinneqassapput.


§ 2-mut

Aalajangersakkap peqqussutip atuuttup § 30-a assigaa, peqqussummi tassani § 32-at ilanngunneqarsimalluni.

Kommunit aqunneqarnerat pillugu malittarisassat nalinginnaasut paaqqinnittarfinni kommunimit ingerlanneqartuni atuutissapput, tassunga ilanngullugit aningaasartuutinut missingersuusiortarneq, naatsorsuuserineq kukkunersiuinerlu pillugit malittarisassat. Paaqqinnittarfiup aammattaaq malitassarai karsip ingerlanneranut, naatsorsuuserinermut kukkunersiuinermullu il.il. malittarisassat kommunalbestyrelsimit akuersissutigineqarsimasut.

Aalajangersakkap kommuni periarfissippaa paaqqinnittarfinnik imminnut pigisunik akuersissuteqarnissamut, tassunga ilanngullugu suliffeqarfiiit sulisumik meeraannut paaqqinnittarfittut pilersitaat.

Paaqqinnittarfik imminut pigisoq tassaavoq suliffeqarfik inatsisitigut namminersorluni ingerlasoq, siulersuisuminit aqunneqarluni aningaasaatinut malittarisassat imaluunniit malitarisassat suliffeqarfiup qanoq aqunneqarnissaanik tunngaviliisut malittarisassallu nalinginnaasut malillugit ingerlatsinermi atuuttussat naapertorlugit ingerlasoq. Inassutigineqarpoq kommunip qulakkiissagaa paaqqinnittarfiup imminut pigisup suleriaatsimut najoqqutassaqarnissaa, tassanilu siulersuisut sulinerannut malittarisassaqarluni.

Nakkutilliinermi nalinginnaasumi kommunip maluginiagassaasa ilagaat pinnguartarfiit qanoq sananeqarsimaneri pinngussallu atorsinnaassusii, eqqiluisaanerup pitsaasuunissaa, meeqqat angallanneqarnerisa isumannaatsuunissaa, tassunga ilanngullugu aqqusinermi angallannermut malittarisassat atuuttut malinneqarnersut.

Pujortartarneq, pujortarfiunngitsunik isersimaartarfeqarnissaq kiisalu pujortagassat nalunaaqutsersorneqarnissaat pillugu inatsisartut peqqussutaanni § 6-imi, imm.2-mi aalajangersagaq malinneqarnersoq nakkutigisariaqarpoq paaqqinnittarfinni meeqqap piumassuserinngisaminnik putsumik najuussuinissaat pinngitsoortinniarlugu.

Nakkutigisariaqartunut ilaavoq paaqqinnittarfiup ingerlanneqarnerani sillimmasiisarnermut tunngasut isumannaatsuunissaat.

Perorsaanermut tunngasutigut nakkutilliinermi kommunip maluginiartariaqarpaa ulluunerani neqeroorutit pillugit anguniagassatut siunertat suliassallu naammassiniarneranni piginnaanerit pisariaqartinneqartut sulisut akornanni pigineqarnersut. Nakkutilliinissamik aalajangersakkamut ilaavoq kommunip nakkutigisariaqaraa ulluunerani paaqqinnittarfeqarnermik neqeroorutit ataasiakkaat siunertat maleruagassallu kommunimit piumasarineqartut naapertorlugit suliassaminnik aallussivinnersut, ingerlatsinerlu siunertamik naammassinniffiusinnaanersoq.

Taamaattumik nakkutilliineq annertunerusumik paaqqinnittarfimmik attaveqaqatigiittuarnikkut ingerlasariaqarpoq, suliap aallunnerani siunertat periutsillu oqallisigalugit.

Meeqqat ataasiakkaat perorsaariaaserluunniit pillugit aaqqiagiinngissuteqartoqalissappat, kommunip nakkutilliisussaatitaanerminut atatillugu pisussaaffigaa paaqqinnittarfik angajoqqaallu suleqatigalugit aaqqiagiinngissutip anigorneqarnissaanut peqataassalluni.

Paaqqinnittarfiit imminut pigisut eqqarsaatigalugit nakkutilliisussaatitaanermik piumasaqaat kommunip siulersuisunut ilaasortassamik toqqaaneratigut taamaallaat naammassineqarnavianngilaq.

Kommunip nakkutilliisussaanerata saniatigut paaqqinnittarfiup imminut pigisup siulersuisui nammineerlutik nakkutilliinissamut akisussaaffeqarput. Siulersuisut nakkutigissavaat paaqqinnittarfiup allaffissornikkut aningaasaqarniarnikkullu ingerlanera siunertamut paaqqinnittarfiullu aqunneqarneranut ingerlanneqarneranullu naapertuuttuunersoq.

Paaqqinnittarfiup piumasaqaatit naammassisimanngikkaat paasinarsippat, kommunip paaqqinnittarfinnik ingerlatsisussaanini naapertorlugu pisariaqartunik allanngortitsissaaq.

Paaqqinnittarfiit imminut pigisut eqqarsaatigalugit kommunip pissutsit allanngornissaat piumasarisinnaavaa imaluunniit ingerlatsinermut isumaqatigiissut atorunnaarsissinnaallugu.


§ 3-mut

Aalajangersagaq peqqussutip atuuttup § 28-anut naapertuutipajaarpoq. Oqaasiliornerit allannguuteqartinneqalaarput.

Ulluunerani angerlarsimaffimmi paaqqinnittarnerup allaanerussutigaa meeqqanik ikittuinnarnik paarsaqarfiusarnini, paaqqinniffillu tassaalluni nammineerluni angerlarsimaffigisaq, amerlanertigut tassaalluni paarsisartup nammineq angerlarsimaffia. Kommunimi ulluunerani angerlarsimaffimmi paaqqinniffeqarnermik pilersitsisuusumi meeqqanik paarsineq aallartitsinnagu ileqquusoq malillugu angerlarsimaffik inillu paarsiffiusussat akuerineqaqqaartussaapput. Akuersinermut atatillugu angerlarsimaffimmi pissutsit misissorneqartussaapput, illup sananeqaataa iluani silataanilu misissorneqarlutik kiisalu paarsisussat inuttut piginnaassusii misissorneqassallutik.

Ulluunerani angerlarsimaffimmi paarsisartup akissarsiaanut atorfinitsitaaneranullu tunngasut aalajangersarneqassapput S.I.K.-p Naalakkersuisullu isumaqatigiissutaat malillugit.

Ulluunerani angerlarsimaffimmi paarsinermik nakkutilliineq ataavartumik nakkutigineqassaaq meeqqat illersorsinnaasumik atugassaqartitaanersut qulakkeerniarlugu. Ilanngullugu angerlarsimaffimmi paarsisoq tapersersorneqartuartariaqarpoq, ulluinnarni sulinera kisiat eqqarsaatiginagu aammali ajornartorsiutit immikkut ittut meeqqanit ataasiakkaanit atugaanissaat imaluunniit ulluunerani angerlarsimaffimmi paarsisup angajoqqaallu akornanni atuuttut. pitsaaliorniarlugit.

Ulluunerani paaqqinniffimmik nakkutilliineq pissaaq ini paarsiffiusoq piffissallu annersaani meeqqanit najorneqartartoq aallaavigalugu. Angerlarsimaffimmi ilitsersuinermut ilanngunneqarsinnaapput ataatsimoortitsilluni ataatsimiisitsineq aammalu ulluunerani angerlarsimaffimmi paarsisartut aamma/imaluunniit angajoqqaat ataatsimoortillugit ilitsersuineq alla.

Angerlarsimaffimmi paaqqinninneq kommunimit ingerlanneqartoq illersorneqarsinnaanngitsumik ingerlasoq paasinarsippat kommunip akuliunnissani pisussaaffigaa. Tamanna illup sananeqaataanut - iluani silataanilu - kiisalu ulluunerani angerlarsimaffimmi paarsisartup inuttut piginnaanerinut tunngavoq. Pissutsit ilungersunarpallaanngitsut atuutsillugit taakku iluarsineqarnissaat kommunip isumagisassaraa.


§ 4-mut

Aalajangersagaq peqqussummi atuuttumi § 27 assigipajaarpaa. Oqaasiliornera allannguuteqalaarpoq.

Ilanngullugu peqqussummi atuuttumi § 27, imm.2-mi aalajangersagaq peerneqarpoq. Aalajangersakkap aalajangersarpaa ulluunerani angerlarsimaffimmi paarsisartut assigisaallu meeqqanik tallimanik amerlanerusunik 14-it inorlugit ukiulinnik paarsaqartut namminerisaminnillu pisortanit aningaasaliiffigineqaratik ingerlasut kommunalbestyrelsi akuersiseqqaarlugu pilersinneqarlutillu ingerlanneqarsinnaasut.

Peqqussutissatut siunnersuummi taamatut aalajangersagaqarnissaa ilanngunneqarsimannginneranut pissutaavoq paaqqinnittarfinnik imminut pigisunik meeqqanillu tallimanik amerlanerusunik paarsaqarniarluni pilersitsinissamik kissaateqarnermi suliffeqarfiit sulisumik meeraannut paaqqinnittarfinnik misileraalluunniluunniit ingerlatsinermi pilersitsinissamut peqqussutissatut siunnersuummi § 5, imm. 1-imi periarfissiisoqarsimaneri.

Ulluunerani paaqqinninneq namminersortunit ingerlanneqartoq pisortat ulluunerani paaqqinninnermi neqeroorutaasa avataani ingerlasarpoq, taamaattumillu kommunip ulluunerani paaqqinninnissamut neqeroorutaanut ilaanani, tak. § 1. Inuit paaqqinniffinni sulisorineqartut kommunimit atorfinitsitaanngillat. Aaqqissuussineq pisortanit tapiiffigineqanngilaq taamaallaalli angajoqqaat akiliutaannit namminersortunillu tapiissutaasimasinnaasunit ingerlanneqarluni.

Meeqqat kikkut inissaqartinneqarnissaat, angajoqqaat akiliutaat kiisalu angajoqqaat akuliussinnaassusiat pillugit malittarisassaqanngilaq. Ulluunerani angerlarsimaffimmi paarsisoq namminersortuuvoq, namminerlu aalajangertarlugu meeqqat kikkut paarissanerlugit. Angajoqqaat akiliutigisartagaat aalajangersorneqartarpoq ulluunerani angerlarsimaffimmi paarsisuusup namminersortup angajoqqaallu akornanni isumaqatigiissuteqarnikkut, angajoqqaallu angerlarsimaffimmi paarsisumut namminneq akiliisarput.

Namminersortutut ulluunerani angerlarsimaffimmi paarsinissamut akuersissuteqarnermi kommunip ulluunerani angerlarsimaffimmi paarsisitsisarnermut maleruagassaat assigalugit pissaaq. Angerlarsimaffimmi pissutsit kommunimit akuerineqarsimappata ulluunerani meeqqanik paarsaqarsinnaanermut akuersissummik tunniussisoqartarpoq, angerlarsimaffimmi nukissat ataatsimut qimerlooreerlugit, tassunga ilanngullugu nammineq qitornat amerlassusii, meeqqat ukiuisa nikinganeri il.il.

Namminersortutut ulluunerani angerlarsimaffimmi paarsinissamut kommuni allakkatigut akuersissuteqartoqassaaq. Meeqqat ataasiakkaat aalajangersimasut paarsassatut akuerineqarsinnaapput meeqqallu immikkut akuersissuteqarfigineqarnerat allaganngorlugu tunniunneqassaaq. Akuersinermi aamma meeqqat nikerartut aalajangersimasumik amerlassusillit pineqarsinnaapput. Taamatut akuersissuteqartoqartillugu meeqqat paarsassanngortut qanoq amerlatigineri ukiuilu allassimassapput. Akuersissummi ersissaaq init siunertamut atorneqartussat suuneri.

Ulluunerani angerlarsimaffimmi paarsisup namminersortup ingerlatsinera kommunimit nakkutigineqassaaq. Nakkutilliineq pissaaq inimi paarsiffiusumi. Kommunimit paasineqarpat pissutsit angerlarsimaffimmi paarsiffiusumi namminersortumi illersorneqarsinnaanngitsumik ingerlasut, akuersissut tunniunneqarsimasoq kommunimit utertinneqarsinnaavoq.

Meeqqanik inuusuttunillu ikiorsiisarneq pillugu Inatsisartut peqqussutaanni nr. 9-mi, 30. oktober 1992-imeersumi § 1 tapertaliullugu nakkutilliineq malittarisassiuunneqassaaq, tamatumalu kinguneranik kommunip nalinginnaasumik pisussaaffigilissavaa meeqqat kommunimi najugaqartut qanoq atugassaqartitaallutik inuunerannik nakkutilliinissani.

Ulluunerani angerlarsimaffimmi paaqqinninnermi meeqqat 1-2-t taamaalaat paarineqarpata kommuni akuersissuteqarsimanngikkaluaruniluunniit pissutsit qanoq innerannik nakkutilliisussaatitaassaaq. Kommunip naliliinera naapertorlugu angerlarsimaffimmi meeqqanik 1-2-nik paarsiffiusumi pissutsit illersorneqarsinnaanngippata, kommunip angajoqqaat siunnersortariaqarpai qitornartik tassani paariteqqunagu. Taamatut siunnersorneqarneq angajoqqaanit malinneqan-ngippat, meerarlu taamatut paarineqarnermini navianartorsiortutut nalilerneqarpat, kommunimit isumaliutigineqartariaqarpoq meeqqanik inuusuttunillu ikiorsiisarneq pillugu inatsisartut peqqussutaat tunngavigalugu iliuuseqarnissaq pisariaqannginnersoq.


§ 5-imut

Aalajangersagaq taanna nutaajuvoq, kommuninilu paaqqinninnermik neqeroorutinik assigiinngitsunik arlaqarnerusunik misileraanissamik periarfissiilluni.Tamatuma malitsigisaanik aalajangersakkat allaanerusumik paaqqinninnermik pilersitsinissamut aporfiusinnaasut unioqqutinneqarsinnaanerat. Angajoqqaat akiliuteqartarnerat pillugu aalajangersakkat unioqqutinneqarsinnaanngillat. Aamma kommunip nakkutilliisinissamik pisussaaffeqarnera unioqqutinneqarsinnaanngilaq.

Kommunip qinnuteqaat Naalakkersuisunut akuerisassanngorlugu ingerlatissavaa.

Qinnuteqaatip makkuninnga imaqassaaq:

Misileraanermut akuersissut atorunnaarsinneqarsinnaavoq misileraanermi atugassarititaasut malinneqanngippata.

Atorunnaarsitsinermi misileraanermi meeqqat inissaqartinneqartut allami inissaqartissaat kommunip pisussaaffigilissavaa.


§ 6-imut

Aalajangersakkami peqqussutip atuuttup § 49-at ilassuserneqarpoq allannguutaalluni aalajangiinerit sorliit Inunnik Isumaginninnermi Naammagittaalliuteqartarfimmut naammagittaalliutaasinnaanerisa erseqqissarneqarnerat. Tamatumunnga pissutaavoq suliassat naammagittaalliuteqartarfimmut ingerlateqqinneqartartut killilersimaarneqarnissaat, suliat kommunimit missiliorneqareerlutik naliliiffigineqartut naammagittaalliuteqartarfimmi allanngortinneqarsinnaanerat periarfissikkumallugu.


§ 7-imut

Inatsisartut peqqussutaata akuerineqarneranut nalunaarummillu suliaqarnermut atatillugu naatsorsuutigineqarpoq makkua atorunnaarsinneqarnissaat: Meeqqat ulluunerani kommunip paaqqinnittarfiutaaniittarnerannut kommunimilu ingerlanneqartumik angerlarsimaffimmi ulluunerani paarineqartarnerinut akiliut pillugu Namminersornerullutik Oqartussat nalunaarutaat nr. 28, 13. september 1989-imeersoq, kommunit aaqqissuussaannik ulluunerani angerlarsimaffimmi paarsisitsisarneq pillugu Namminersornerullutik Oqartussat nalunaarutaat nr. 65, 29. december 1994-imeersoq kiisalu kaajallaasitaq nr. 129, meeqqat ullukkuinnaq paaqqinnittarfinnut/ulluunerani angerlarsimaffimmi paaqqinnittarfinnut kommunimit ingerlanneqartunut inissinneqartarnerat pillugu aamma kaajallaasitaq nr. 176, ulluunerani paaqqinnittarfinni tunaartassaq, siulersugaaneq ingerlatsinerlu pillugit.